Gazzetta di Modena

Una giornata di sole splendente. L'ideale per convincere i modenesi ad uscire di casa e a riversarsi in piazza Grande per l'appuntamento più amato del Carnevale: il corteo della famiglia Pavironica e lo sproloquio di Sandrone. Un Sandrone in grandissima forma che ha snocciolato una serie d ibattute una più divertente dell'altra. Ad accogliere i Pavironici in Municipio c'era il sindaco Gian Carlo Muzzarelli che di buon grado gli ha ceduto la fascia tricolore di primo cittadino (ma solo per qualche minuto...) Di seguito il testo integrale dello sproloquio.

#Modena Cambia sindaco: Addio @GCMuzzarelli Inizia l'era di #Sandrone #Pulonia first lady ;-D http://t.co/fGt6rykSgU pic.twitter.com/T0oQgtgGkG

— Gazzetta di Modena (@gazzettamodena) 12 Febbraio 2015

Sandrone.: Mudnés ed Mòdna, Zemiàn ed raza e Zemiàn geneticamente modificati, oriundi del centro storico e extracomunitari dla zona Tempio, cinés, giaponés, africàn, sud-americàn, indiàn e filipèin  sparpaiè per tótta Mòdna,  a-v salut tótt quant in masa.

Scusè al riterd, ma préma ed gnir chè la Pulonia l’ha vlû a tótt i cást andèr a váder la nóva piaza Ráma e quand l’ha vest che invece ed ‘na funtana i han fàtt di funtanaz, l’ha dett: “  Ma quist chè i gh’eren bèle al teimp dal Dóca Pasarein .

Pulonia.: Difàti mè a sperèva chi avéssen fàtt ‘na funtana come qualla di “ Tre V “ ch’a gh-è a Ráma dove i turésta i gh bóten deinter el munéd per pséregh turner.

[[atex:gelocal:gazzetta-di-modena:modena:foto-e-video:1.10852336:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-sandrone-diventa-sindaco-1.10852336]]

San.: Lasa pérder Pulònia, s-i feven un lavor acsè a Mòdna, i soliti ignoti i purteven via  sold e funtana.

Pul.: Sé, ma mè a dégh, strusièr tanta aqua per un lavor cumpagn…… cun quall ch’l-a càsta al dé d’incô…

Sgorghiguelo.: Ma mama cl’ aqua lè, l’è come la nova Giunta dla Comuna: l’è tótta  ricicleda!!!  I l’han fata aposta perchè i turésta i-s pòssen rinfrescher i pê.

[[atex:gelocal:gazzetta-di-modena:modena:cronaca:1.10857162:Video:https://video.gelocal.it/gazzettadimodena/locale/lo-sproloquio-di-sandrone-in-piazza-grande/40827/41058]]

San.: Per i turésta e per chi pover Zemiàn ch’a gh táca ed gnir in ceinter a óngia…Oh perché  cun piaza Ráma rinovèda a dveinta seimper piò dificil catèr da parchegèr atés al ceinter; adèsa ai Mudnés a gh è armès trê possibilitè: 1) Parchegèr a gratis a la Crusatta o a la Maduneina,  2)  Aver la fortuna ed catèr un bus in dal  strési blò di vié, spindand ‘na sbisachèda d’euri  3)  suplîr la machina in dal Catacombi dal Novi Park. A meno chè dòp ch’a v-sî imbraghè e ch’a-i-avî fàt trê volti al gir dal Parco seinza catèr un post, a-n-v rassegnèdi  a purtèr  la machina in garage a cà vostra e a gnìr in ceinter in ciclo…. sperand ch’i n-n e’v la cóchen ….. Fê ma cum’a-v vlî: o magnèr sta mnestra o  saltèr  da la fnestra.

[[atex:gelocal:gazzetta-di-modena:modena:foto-e-video:1.10852377:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-lo-spettacolo-in-centro-a-modena-1.10852377]]

Sgo.: Popà, basta parler ed brót lavor, parlam mò ed desgrazi.

San.: A proposit Zemiàn, gî sò, cum’andamia col séndech nov? A m’è d’avìs che a la préma prova a-s sia piantè in dla néva vest Cuma i éren arabî i Zemiàn ch’i-s duviven móver per andèr a scola o a lavurer. Nuèter,ch’a gh’avam dal váder a-s la sam sgavagnèda cun l’oli ed gámet e un bel palòt. A-i-ho pò savû che al ballottaggio storico Giancarlo l’è pasê seinza strabóch, ma agl’ elezion, s’a n-n’era perché l’unica dànna in corsa la s’è ritirèda col cuntintein, a gh i-n srév gnû dla féssa. Ma, cum’a s dis, l’important l’è la pès in famia e che mitandes a tevla, ‘na scrana e un pcoun ed pan con dal cumpanadegh a gh sia per tótt.  A staràm a vàder s-l’è vera che granèda nova la spaza méi la cà, perché Mòdna l’ha propria bisàgn  d’eser piò pulida, specialmeint adesa ch’ariva un sach ed furastér a vàder al Dòm e l’Accademia tirè a lucid. Pusìbil che a la dmànga mateina in ceinter a-ch sia ancàra  al rósch dal sabet sira? Sgnor ministrador,  s’a-v cala al personel,  cambiè la peturèina zala agli ausiliari del traffico e fêi dvinter ausiliari dal rósch, a i-avrévem Mòdna piò pulida e i zemiàn piò cunteint. E po’ l’è anch ora ch’a catèdi ‘na soluzioun perché nisun sa in dove sbater el cech e quilli per tèra e-n fan brisa un gran bel vàdder. L’è abasta ch’a-gh mitìdi di baslot cun dal sabioun langh el stredi dal ceinter…..a-n srà menga ‘na gran spesa.

[[atex:gelocal:gazzetta-di-modena:modena:cronaca:1.10851225:Video:https://video.gelocal.it/gazzettadimodena/locale/societa-del-sandrone-tutti-pronti-per-il-giovedi-grasso/40786/41017]]

Pul.: A proposit, Sandroun, ma è vera che Muzarel l’ha fat caréra anch in provincia ?.

San.: Sicura! Infati, s-t’a-l vàd in gir per Mòdna t’l è da ciamer sgnor Sindaco, s-t’a-l cat a Fanan t’a-l dév  ciamer Presideint, et  vedrè che lò a-s volta in tótt el manér.

[[atex:gelocal:gazzetta-di-modena:modena:foto-e-video:1.10851401:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-la-sfilata-e-l-arrivo-in-piazza-1.10851401]]

Pul.: Bèin ma alora l’ex Presideint dla Provincia,é-l armès a spas?

San.: Ma no Pulonia, i g’han sol spustè la scrana inzéma al guard-rail dl’autostreda Campgaian-Sassol….

Pul.: Bèin a t’ho da dir che a me Giancarlo a-m piès dimandi, e po’ le partì cun n’ha spinta ch’a pèr  ch’i s l’aven tirè cun ‘na sframbla. S’a l tin bòta forse a gh’la cavarà a cambier ghégna a Mòdna.

San.: Certo che del parol a l n’ha spés dimandi. Per al tema sicurezza contro la malavita l’ha dét ch’a l mitrà in camp dés vigil de piò…..

Pul.: Sbòcia Chicàtt!?

[[atex:gelocal:gazzetta-di-modena:modena:foto-e-video:1.10851085:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-le-maschere-si-preparano-alla-sfilata-1.10851085]]

San.: A speram sól ch’i n zoghen a la scundróla come chi eter ch’i n s vàden mai; o ch’i n ciapen l’influeinza come quî ed Ráma. L’ha anch dét che vuole recuperare i luoghi del degrado, chissà ch’a-n sia la volta bouna che oltre a sistemer la vecia  Posta in stazioun, a-n matta el man anch all’Ex A.M.C.M. Ognimodo Giancarlo,  s-a poss dèret un cunséli, mè, in dla lesta dal degrado a gh mitrév  anch piaza Mateoti e a-n descurdèret ch’a gh è ancàra in sospes,fin dal 1982, la sistemazioun ed la zona fonderie: a-n vrév menga che cun la smania ed fèr i lavor nov et lasés indré chi  vecc..

Pul.: I lavor vecc i polen aspetèr, adesa a g’avam da pensèr a la féra ed Milan, all’Expluà, sperand che i turesta da Milan i fàghen un selt a Mòdna .

Sgo.: Mama, a-s dis Expo!!! St’an l’argomeint l’è al “cibo”  e i parlaran dal magnèr ed tótt al mand.

San.: Alora i Talian i faran ‘na bela figura: chè da nueter l’è tótt un magna tè ch’a magn anca mè.   A-i-ho vest in dla Gazàta ch’i volen trasfurmèr la palazzina Vigarani,ai giardein pubblich, in un salone del “Gusto”, dove al post delle “mostre d’arte”, i-gh mitran di salam, di persòtt e dal furmài, per un progetto di promozione e valorizzazione del territorio modenese. Ma vaca ragàz!!!! Quasta sé ch’l’è ‘n’idea moderna e innovativa: s’a n-n’è arte un boun zampoun e dal grana!! Anzi, secand mè, l’è ‘na pensèda ch’l a vol sfrutèda méi. Giancarlo, peinsa cuma starév bein un quadròtt ed ciccioli ed fianch al quèder ed Francesco I°  a la Pinacoteca Estense o ‘na bela butéglia ed lambrosch inzéma a la tèvla  ed l’Ultima Cena.

Pul.:Cambiand argomeint, ma seimper restand  in tema d’arte moderna

dém bein, Sandroun,cum’éla andèda a finir la telenovela dei chioschi in dal Parco?

San.: Ma che chioschi? Tè n-n a’l sè ch’i én dvintè trî monumeint……

Pul.: Trî monumeint?

San.: A-t dégh et sé!! Un l’è al monumeint allo “Spreco”, un èter l’è al monumeint all’ ”Abbandono” e al terz l’è al monumeint a l’ “Ignoranza”!!!

Pul.: Ma seint che roba!! A proposit ho-i-a capî bein chi  volen fèr un nuovo polo ? N’avàmm-i-a menga abasta dal polo nord e dal polo sud?

[[atex:gelocal:gazzetta-di-modena:modena:foto-e-video:1.10852048:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-lo-spettacolo-delle-mascherine-3-1.10852048]]

San.: Ma csa vót mai ch’a-t déga mè Pulonia, l’è tant ch’i disen ed fèr a Mòdna il polo della cultura deinter a l’ex usdèl Sant’Agustein;  finalmeint a  pèr che a merz i tachen i lavor. A gh gnarà: il centro delle lingue per l’universitè, i gh faran del mástri, la scóla ed fotografia, un teater con 200 post  per dal conferenzi, insàma per ferla curta in dóve préma i curèven i malè dòp i curaran i gnorant! Al ceinter a gh gnarà dô tárr  mecanizèdi elti 30 méter: òna girèda vers al nord per controler csa fà i Arsàn, cl’ètra girèda vers sud per tgnir d’occ  i Bulgnés.

Sgo.: A pèr ch’a-s preparáma alla guerra fredda cun i noster cunfinant.

San.: Sicura, bisagna ch’a stáma ateinti perché i Arsan i-s volen purter via la Provincia e l’Universitè, i Bulgnés, la féra… Alóra  Mudnés, adesa ch’a v sî abituè a la crisi e a-i –avî sméss ed dèr a meint al promessi di noster ministrador ed Ráma, a-v cat piò solevè. Ma sé…. sò col morèl e   guardev datórna ch’a gh’è anch chi stà péz ed nueter.

[[atex:gelocal:gazzetta-di-modena:modena:foto-e-video:1.10852018:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-lo-spettacolo-delle-mascherine-2-1.10852018]]

Sgo.: Mè l’è tant ch’a-m guerd datórna, ma a vad sól dla maràia ch’l-a stà méi che mè.

San.: A-n n’è brisa vera tamban,  anch a Mòdna a gh’è dla poverté e geint ch’l-a  g’ha bisàgn d’esser aiutèda. E po’ bisagna ch’a n-s’descurdama ed tótt i migrant  ch-i riven dal mer sò del bèrchi tant veci che del volt  un quelchidun  a gh lasa la pèla.. ..

Però, nueter Talian, a stam a l’unor dal mand:  a-gh dam da magner, da durmir, el sigaràt e ‘na diaria ed  soquant Euro al dè per el prémi spesi…..

Sgo.: Set popà che  in un di ultem barcoun recuperè a Lampedusa a gh’era deinter 80 pensionè italian che a count fatt i avreven ciapè  piò ed diaria che’d pensioun?

San.: T’è propria un sumer  ed dev pensèr che l’Europa l’a-s guerda.

Sgo.: A srév méi che lalor i  guardéssen a cà sua invece che gnir a fèr i méster a cà nostra…. E po’ l’è anch ora che al “mare nostrum” al dveinta anch al mare lorum!!!!

San.:Turnand a Mòdna, Zemiàn, a-v dev dir che la crisi la dveinta seimper piò pesa…., a-n sò ueter, mè a-m sun magnè anch chi dû sold ch’aviva méss via per quand a srà ora d’ander al Terra Cielo da Gibellini. In gir a-s seint dir ch’la va méi: a srà anch vera, ma a vàd ch’a cráss el tàss,(e al sendech a-s n’è rivendichè al mérit cun la proméssa ed fèr ‘na zitè piò bela.Avrà dir che al tgnaràm controlè ) i negozi i sèren, di puvràt a-gh n-é seimper de piò….

[[atex:gelocal:gazzetta-di-modena:modena:foto-e-video:1.10851916:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-lo-spettacolo-delle-mascherine-1.10851916]]

Sgo.: Popà,bisàgna ch’a tulama eseimpi dai Merican, lor in un an i han aumentè al Pil dal 5%.

Pul. Dio che fiol ch’a-i-ho fat… Piò passa al teimp piò al dveinta inteligeint!

San.: S-t’al di tè . Per mè, un ch’l’è caioun a la mateina al l’è anch a la sira!

Pul.: Ma Sandroun, perché a-n dámia menga a meint  a Renzi? S’a féssen un putein, Matteo a-s darév méll euro anch a nueter… al set tè…..

[[atex:gelocal:gazzetta-di-modena:modena:foto-e-video:1.10851865:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-sandrone-sindaco-di-modena-1.10851865]]

San.: A pèrt che per cal lavor lè mè a-i-ho pérs dimandi in memoria…. A-m vàdet, a la mê etè,  cambier al panulein al ragazol?

Pul.:Ecco, come  al solit, quand a gh’è quel da ciapèr, tè te-n gh’è mai!!  Guerda sol  cla famia ed furaster chi stan poch luntan da cà nostra: lor cun set fiô i-s peghen l’afét e al riscaldameint….

San.: Sé ….ma i peghen anch al fîo!!!!

Pul.: Ragazoli cuma stev? A-v vad in céra…. A-m fa propria piaser…..Ma i-v vest Sanremo? A sun imbraghèda e po’ anch dimandi… mè a dégh che tra l’Emma, l’Arisa  e l’ambrosa ed Raul Bova, avsein a Carlo Conti, a psiva fèr la mê bela figura anca mè…..e po’ a sun anch arabida cun la televisioun… Tótt al dè i van adré cun del rizèti della “novella cucina” che lor i la ciamen pò in frances…..”nouvelle cusine” che sono poi piatti nuovi e colorati…..i faran un bel vader…..ma dimandi occ e poca sostanza.   A-i-ho pruvè a fèri, Sgurgheghel ch’l’è zoven, a-n gh’è stè mèl,ma qual ch’a-n-m’ha dét  Sandroun al s-l’è descurdè…

San.:  Tè va avanti  a fèr di macaroun cun dla sulzéza e dal cudghein coi fasô…… i sran piat ed l’antiga cuseina a tinta unida, ma mè a-n fagh brisa cambi!!!!

[[atex:gelocal:gazzetta-di-modena:modena:foto-e-video:1.10851842:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-il-corteo-per-le-vie-di-modena-3-1.10851842]]

Sgu.: Popà, possia saluter i mê amigh a la tô manéra? Mudnés ch-a sî nè a l’ambra dal Palapanini e Zemiàn ch-a sî chersû inzéma ai gradoun dal Braia, a-v salut tótt quant in massa!! Che al 2015 al srà un an pin ed sudisfazioun a-l’avàm capî subét cun al Modena Volley ch’l ha vint la coppa Italia e adesa l’è adré a pensèr anch a un traguerd pio’ gròs. A la Ferari i han spedî Montezemolo a guider i treno e  po’, ch’la vaga cuma la vaga,cun Vettel e al nóv diretor, ed sicur si ARRIVABENE!! Ai Canarein, per pensèr in grand, a gh vol un poc pio’ ed fantasia, speràm che al nóv presideint Caliendo, ch’al g’ha la cà a Montecarlo ma i brazein curt a Mòdna, per un riterd ed dû minut a-n s-faga menga dvinter l’ultma roda dal car. Dedré dal Sassol ch’l’è in A, pazinzia, ma brisa dedré dallo stupefacente Carpi.

[[atex:gelocal:gazzetta-di-modena:modena:foto-e-video:1.10851746:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-il-corteo-per-le-vie-di-modena-1.10851746]]

Pul.:Dai mò Sandroun ch’andam a cà, a sam via da stamateina, a-n vrév menga  ch’a truvésen la cà ocupèda…..

San.: A-n ster mèl Pulonia, chi vot  ch’a vègna a stèr a cà nostra: cun ‘na stala da mónzer  e al cèso dedrè da la massa!?..   Mudnés, fèv curag’….. pensè al bein che al mèl purtrop al vin da per lò e s’a-v duvés gnir la brótta idea ed fichèrev sàtta al treno, lassè perder perché adesa chi han desmés la ferovia a la Maduneina a-v tucarev d’ander fin  a Zitanova. A vrév anch fèr ‘na proposta al Retor dl’Universitè: Magnifico, a gh zunta bein ‘na facoltè nova: “Filosofia dell’Adattamento”…. A vàder se i noster fiô ’na volta tolt la “laura”, i s’adaten  anch a fèr di lavor da spurchères el man…. Lasèm spander ancàra dô paròl per augurèr al noster Arcivàschev che a-l s’armátta in salut prest,bein e dal tótt, perché a gh’avam seimper bisagn dal sô insegnameint  e dla sô bendizioun. Préma d’ander via    a dagh anch al benvenuto al nóv Generel dl’Academia e a-v salut cun la speranza che tótt i politich i tóghen esempi da Napolitano, che è salito al “Colle” con la scorta e l’auto blù e dop nov an l’è turnèe a cà sua cun sol la “Clio”. E a m’arcmand Zemiàn: come seimper arcurdèv ed tgnirev stréch a la piopa ch’l’è po’ cla piopa elta e sácca, pianteda in dl’umbréghel ed Mòdna e ch’l’a-s ciàma Ghirlandèina!!!!

[[atex:gelocal:gazzetta-di-modena:modena:foto-e-video:1.10851707:MediaPublishingQueue2014v1:https://www.gazzettadimodena.it/modena/foto-e-video/2015/02/12/fotogalleria/giovedi-grasso-la-partenza-del-coerteo-dalla-stazione-1.10851707]]