Gazzetta di Modena

Tant auguri per Nadel

che l’an nov al sia piò bel

cun l’aiut ed Gesò Bambein

la salut l’av staga asvein

e acsè me cher Mudnes

a sam rivèe al’ultem mes

cun di suspir e di magoun

d’un an bròt, ma bròt daboun!!

Ma tra còcc e bòcc e di spintoun

A l’am méssa in un cantoun

E ‘sta aneda maledàta

cla sà méss tòt in bulàta!!!!

A crèss la lus a crèss al gas

A crèss l’aqua e anch el tas

A cràss la rabia, a cràss el voj

A cala i sold dal portafoj

Seinza dir i alimenter

Crassen seimper a tòt ander

I detersiv, savoun, merlàt….

 A cràss purtrop anch i puvràt

A g’am ‘na guera ed drée da cà

Che me an sò perché l’as fà

S’le per al gas o per al furmeint

Mitand in znocc tant povra geint

Me a m’arcord che iven détt

Cl’as-srev finida dàp subétt

L’è un lavor da imparer

Cl’an duviva gnanch tacher!!!!

Si druvessen cugnizioun:

Masser di am l’è da cojoun!!!

A g’am avùu un cheld da inferen  

Adesa an riva piò l’inveren

Cun un sàcc e cun n’arsura

I fiò m vod da fer paura

A se schèe anch tòt i pàz

E sa piov, piov gaz a gaz

“ste ateinti ai rubinàtt”

Ma vliv ca vaga a let melnàtt??

Druer l’aqua cun economia

L’è qual ca da fer ogni famja!!!

Cun  cunflét e discussioun

a sam andèe agli-elezioun

è risultèe un cambiameint

ch’s lameinta e chi è cunteint

andrala mej o andrala pez?

As vedrà fra soquant mes

La politica an la c-gnass brisa

I fan come i leder ed Pisa!!!

Litighedi e dal biastàm….         

E a la sira a tevla insàm

Cun egl-ogni e cun el man

Tòt is tinen stréch el scran!!!!

Smotameint,  aqua a bombe

Tòt i dè un’ecatombe…..

E la violenza  su chel dàn?

Che igh lassen spèss el pàn

Bisàgna dir a chi barabai

Che l’è ora ed deregh un taj!!!!

Al bullismo un argomeint

Ades l’è  moda tra studeint

Sculer chi peccen i professor

Gi bein so s-le un bel lavor….

Basta ades arcmadazioun

fam i Auguri dal Sandroun

pes, salut tant’ armonia

dev regner in ogni famja

sàta l’elber col Bambein

a se vlàma tòt piò bein!!!!

Cher Zemian cun tòt al còr

Fam dal Nadel, festa d’AMOR

AUGURI  AUGURI  AUGURI

Sauro Torricelli